我嘅職業係：冥婚輔導員（下）
上集：https://bit.ly/3gDJD86
「你想點樣離婚？」冥婚嘅禮式度度都唔同，但我真係唔清楚，冥婚點樣離婚。
琪琪答：「至少要將我嘅屍骨移出阿邦嘅墳墓，要分墳！」
鬼魂除非修成鬼仙，否則每日都有一段時間，會留喺屍骨附近。
所以，琪琪同阿邦葬埋一齊，就意味住，琪琪每日都要對住阿邦，類似同居咁。
我當時冇諗咁多，琪琪叫我傳話，我咪幫手囉。
點知，琪琪嘅父母點都唔肯分墳。
琪媽嘆氣：「分咗墳，琪琪就會孤零零一個人，做隻遊魂野鬼，好慘㗎。」
我解釋：「琪琪完全唔鍾意阿邦，突然間，就做咗阿邦個老婆，慘過盲婚啞嫁，佢好難接受嘅。」
琪爸大怒：「個個冥婚都係咁㗎啦，點解係佢咁多問題？」
「係囉，佢都結咗婚，對婚姻要有責任㗎嘛。」琪媽皺晒眉頭。
呢個時候，我耳邊響起刺耳嘅尖叫聲：「又唔係我揀同佢結婚，我有咩責任？」
原來，琪琪唔放心，特登嚟睇吓我同佢父母溝通成點。
琪爸琪媽雖然睇唔到琪琪，但從我嘅神情中，好快就意識到發生咩事。
琪媽開始喊：「琪琪啊，你知唔知，要結到一門合適嘅陰親，有幾難？你離咗婚，好難再嫁㗎啦。」
「咁我咪唔再嫁囉，我寧願做孤魂野鬼！選擇同邊個結婚、結唔結婚都係人權嚟㗎。」琪琪強調。
琪爸望向我：「個衰女講咩？」
我婉轉咁講：「佢話結婚嘅選擇係……人權。」
「就算係『人權』，都唔係『鬼權』。」琪爸嗤之以鼻：「有本事佢去法院告我丫嘛。」
呢場對話不歡而散。
之後，我同阿邦見面，講出事情嘅始末，睇吓佢屋企人可唔可以幫手。
估唔到，阿邦話，佢生前暗戀過琪琪，依加死後做夫妻，佢係好滿意嘅。
我話：「但係琪琪唔滿意。」
「畀啲時間我，我一定會打動到佢。」總之，阿邦點都唔肯放手。
琪琪好唔開心：「我從來唔想同佢結婚，同強搶民女有咩分別？」
佢開始利用自己微薄嘅靈力，製造麻煩，例如搞到屋企陰風陣陣，夜半鬼哭咁。
我驚再咁落去，琪琪會變成厲鬼，我唯有成日去琪琪同阿邦屋企，希望說服到佢哋嘅父母。
終於有一日，琪爸琪媽帶住一個道士同一大班人，浩浩蕩蕩咁去琪琪同阿邦嘅墳墓度。
我好開心咁問：「你哋諗通咗，要幫琪琪分墳啦？」
琪爸故作高深咁點點頭：「問題始終要解決，琪琪日日投訴，都唔係辦法。」
我滿心歡喜咁望住道士作法，但愈睇愈唔妥。
我雖然冇學過道術，但同鬼魂溝通得多，都有少少基本了解。
道士做嘅法術，分明唔係要開墳或者分墳，而係要封印。
「做咩要封印琪琪同阿邦？」我衝上去想阻止道士，但馬上被琪爸帶嚟嘅人制伏咗。
「琪琪唔滿意阿邦，都係因為琪琪周圍去、周圍嘈，佢哋相處時間太少。」
琪爸話：「如果佢哋廿四小時都喺個墳度，咪冇咁多事囉。」
琪媽附和：「感情都係相處出嚟嘅，朝夕相對就得。」
阿邦嘅鬼魂都飄出嚟：「係啊，為咗琪琪，我願意放棄我嘅自由，永遠留喺個墳度。」
突然間，雙目通紅嘅琪琪喺半空中出現，發出淒厲嘅嚎叫。
在場大部份人都捂住耳仔，滿面驚恐地望向琪琪。
「小心，佢怨念太深，已經化為厲鬼，連冇陰陽眼嘅人都可以睇到！」道士大叫。
我個頭都好痛，耳仔滲出血絲：「琪琪，冷靜啲。」
「變成厲鬼，係冇得返轉頭㗎。再唔消滅佢，我哋所有人都會死。」道士祭出一張道符，喺琪琪身上爆炸，轉眼間變成一個巨大嘅火球。
「唔好啊，琪琪！」阿邦飛向火球，自己都化成飛灰。
琪爸目瞪口呆，琪媽已經嚇暈咗。
事後，琪爸琪媽都唔肯接受「琪琪已經魂飛魄散」嘅事實。
佢哋日日幫琪琪祈福，希望幫琪琪積多啲陰德。
有一次，我路過佢哋屋企，我見到佢哋跪喺度，念念有辭，神情極度虔誠。
我相信，佢哋好愛琪琪，正如阿邦對琪琪都係真心嘅，嗰一刻先會毫不猶豫咁衝埋去，陪琪琪灰飛煙滅。
但「愛」有時就係咁奇怪，我可以為你死，但我唔肯為你放手。
或者，關於愛，最大嘅難題，就係當我講：「我愛你」，
到底係用我嘅方法去愛你，定用你嘅方法去愛你？
－完－
將專頁設定為「搶先看」/ "See first"，最新故仔馬上睇！
靈魂抽獎：https://goo.gl/MuLCBC
田螺姑娘：http://bit.do/fiyZp
#短故 #短篇 #小說 #陳美濤 #廣東話 #粵語 #tomatochan #我嘅職業係冥婚輔導員
Search